लगातार वर्षा भइरहेपनि शुक्रबार बेलुकी पानी पर्न थोरै कम भएको थियो । तर बागमती खोलाको बहाब त्यति धेरै घटेको थिएन ।
Advertisement 1
बल्खुको सुकुम्बासी बस्तीमा बस्नेहरु आधा रातसम्म आकाशको पानी र बागमती बहाब हेरेरै बसे । मध्यरातसम्म खोलाको बहाब ठीकठीकै थियो ।
बस्तीमा खोला पस्छ भन्ने आँकलन थिएन । त्यसैले धेरैजसो मानिसहरु निदाइसकेका थिए ।
Advertisement 2
‘बिहान ३ बजेतिर पानी बस्तीमा पसेछ’ ५५ वर्षीय राम लिम्बुले भने, ‘पानीको बहाव यसरी बढ्यो कि ज्यान जोगाउनै मुश्किल भयो ।’
रातको समयमा खाद्यान्न, लताकपडा र अन्य सामान निकाल्न मुश्किल भयो । पानीको गति बढिरह्यो । ‘बाहिर झमझम पानी परिरहेको छ । कहाँ जाने ? के गर्ने ? ज्यानै कसरी जोगाउने भन्ने भयो’, अनलाइनखबरसँग लिम्बुले भने, ‘माथिल्लो तल्लामा गएर बस्यौं । भुई तल्लामा लदो आएर पस्यो ।’
Advertisement 3
छोराछोरीसहित पाँच जनाको परिवार रहेको लिम्बुको घरमा २० बोरा जति धान थियो । भर्खरै भित्र्याएको मकै थियो । त्यो मकै र धान कीर्तिपुरको भाडामा लिएको जग्गाबाट उत्पादन गरिएका थिए ।
तर पानीको भेलले केही बाँकी राखेन । ‘त्यो रात सबै जना एकै चिहान भइने भयो भनेर बाच्ने आशै मारेका थियौ’, उनले भने, ‘पानी माथिल्लो तल्लासम्म आइपुग्दा बाँच्ने आशा गर्नु पनि कसरी ?’ धन्न उनी साथ सहयोग पाएर बाँचे ।
उनको परिवार यो बस्तीमा बस्न थालेकै दुई दशक बढी भइसकेको छ । तर त्यस्तो बाढी यसअघि कहिल्यै सामना गर्नुपरेको थिएन ।
‘पानी भुइंँ तल्लामा पसिरहेको हुन्थो । जेनतेन सामानलाई सुरक्षित गर्न सकिन्थो । तर यसपटकको बाढीले ज्यान नै पहिलो कुरा रहेछ भन्ने सम्झायो’, उनले भने ।
